నో కంట్రోల్..పోర్న్ హల్ చల్

లోకమంతటా అంతర్జాలంలో బూతు రాజ్య మేలుతోంది. క్లిక్ చేస్తే చాలు కుప్పలు తెప్పలుగా పోర్న్ దర్శనమిస్తోంది. వీటి బారిన పడిన వారంతా అది చూడ లేకుండా ఉండలేక పోతున్నారు. చిన్నారులు, మహిళలు, పురుషులు, వృద్దులు, యూత్ అంతా బూతు తోనే గడుపుతున్నారు. ఎప్పుడైతే  నెట్ అందుబాటు లోకి వచ్చిందో ఇక అప్పటి నుంచి కోట్లాది ఫోటోలు, వీడియోలు, వెబ్ సైట్స్ హల్ చల్ చేస్తున్నాయి. జనాన్ని జలగల్లా పీల్చుకు తింటున్నాయి. ఒక్కసారి దీనికి అడిక్ట్ అయితే ఇక లైఫ్ అంతా నాశనం అయినట్లే. ఈ పోర్న్ దెబ్బకు కుటుంబాలు కూలి పోతున్నాయి. సంస్కృతి చిన్నా భిన్నమవుతోంది. బంధాలు పలచనవుతున్నాయి.

ఏదైనా సమాచారం కావాల్సి వెదికితే చాలు ఇక అంతా బూతే దర్శనమిస్తోంది. ఇది ఒక రకంగా టెక్నాలజీ మాయాజాలం. ప్రతి రోజుకు కోట్లల్లో వీడియోలు డౌన్లోడ్ అవుతున్నాయి. పోర్న్ స్టార్స్ కు ఎనలేని క్రేజ్ ఉంటోంది. వీరు నటిస్తూనే డాలర్లు పోగేసుకుంటున్నారు. ఎప్పుడైతే నెట్ కనెక్టివిటీ పెరిగిందో ఇక అప్పటి నుంచి బూతుకు అడ్డు అదుపు లేకుండా పోయింది. ఇక సినిమాల గురించి చెప్పాల్సిన పని లేదు. అవి కూడా సెక్స్ ను పెంచి పోషిస్తున్నాయి. నాలుగు గోడల మధ్యన ఉండాల్సిన శృంగారం ఇప్పుడు స్మార్ట్ ఫోన్స్ లలో లైవ్ గా టెలికాస్ట్ అవుతోంది. టచ్ చేస్తే చాలు బూతు వాలి పోతోంది. దీనిని కంట్రోల్ చేసేందుకు ఎలాంటి చట్టాలు పని చేయడం లేదు. 

ఇక యూత్ గురించి ఎంత చెప్పినా తక్కువే. యవ్వనంలోకి అడుగు పెట్టగానే హార్మోన్ల ప్రభావంతో శరీరంలో అనేక మార్పులు చోటు చేసుకుంటాయి. ఆ సమయంలో కొత్త ఉత్సాహం, కోర్కెలు చుట్టు ముడతాయి. సెక్స్‌కు సంబంధించిన విషయాలపై ఆసక్తి పెరుగుతుంది. ప్రస్తుత భారతదేశ ఆచార వ్యవహారాలు, సంస్కృతి సంప్రదాయాలు కారణంగా ఇందుకు సంబంధించిన విషయాలను బాహాటంగా చర్చించుకునే అవకాశం లేదు. నిన్న, మొన్నటి వరకు సెక్స్‌ ఎడ్యూకేషన్‌కు సంబంధించిన విషయాలను పుస్తకాలు, స్నేహితుల ద్వారా తెలుసు కోవటం జరిగేది.

కానీ, మొబైల్‌ ఫోన్‌, ఇంటర్‌నెట్‌ పుణ్యమా అని నేడు పోర్న్‌కు సంబంధించిన కంటెంట్‌ విచ్చలవిడిగా లభిస్తోంది. యువత ప్రధానంగా పోర్న్‌ సైట్లను ఆశ్రయిస్తోంది. విచ్చల విడితనంతో పోర్న్‌ వీడియోలకు బానిస అవుతోంది. అదే వారిలో సెక్స్‌ సంబంధ వ్యాధులకు గురయ్యేలా చేస్తోంది. ఇక వయసుతో సంబంధం లేకుండా దాదాపు 80 శాతం మంది పోర్న్‌ను చూస్తున్నారని అంచనా. ఇప్పటికైనా కంట్రోల్ చేయక పోతే మరింత ప్రమాదం జరిగే అవకాశం ఉంది.