లడ్డూలు ప్రియం..భక్తుల ఆగ్రహం
ఇప్పటి వరకు దివ్య దర్శనం, సర్వ దర్శనం భక్తులకు 70కి నాలుగు లడ్డూలు ఇస్తుండగా ఇకపై రాయితీ తీసేసి ఒక్కో లడ్డూను 50 రూపాయల చొప్పున అమ్మాలని భావిస్తోంది. ఈ మేరకు కొత్త ప్రతిపాదనలను టీటీడీ ధర్మకర్తల మండలి ఆమోదం కోసం పంపనుంది. మరో వైపు శ్రీవారి లడ్డూల అమ్మకాన్ని లాభాపేక్షతో చూడటంపై భక్తుల నుంచి తీవ్ర విమర్శలు వ్యక్తమవుతున్నాయి. అలిపిరి, శ్రీవారి మెట్ల మార్గాల్లో నడిచి వచ్చే దివ్య దర్శన భక్తులకు ఒక ఉచిత లడ్డూను ఇస్తున్నారు. వీరికే సబ్సిడీ ధరతో10 చొప్పున 20కి రెండు లడ్డూలు, 25 ధరతో మరో రెండు లడ్డూలు అంద జేస్తున్నారు. నడిచి వచ్చే భక్తులు 70 ధరతో ఒక ఉచిత లడ్డూతో పాటు మరో నాలుగు లడ్డూలు పొందుతున్నారు.
ఇక టైం స్లాట్ టోకెన్లతో పొందే సర్వ దర్శనం, కంపార్ట్మెంట్లలో వేచి ఉంటూ సర్వ దర్శనం పొందేవారికి కాలిబాట భక్తుల తరహాలోనే 70కి ఉచిత లడ్డూ మినహా నాలుగు లడ్డూలు టీటీడీ అంద జేస్తోంది. టీటీడీ ప్రతిపాదించిన కొత్త విధానంలో అందరికీ ఒక లడ్డూ మాత్రమే ఉచితంగా అందజేస్తారు. అదనంగా మరో 4 లడ్డూలు పొందాలంటే 200 ధర చెల్లించక తప్పదు. కొత్త విధానంలో కాలి నడకన వచ్చే భక్తులు ఐదు లడ్డూలు పొందాలంటే అదనంగా 130 చెల్లించాల్సి వస్తుంది. కాగా 175 గ్రాముల ఒక లడ్డూ తయారు చేయడానికి టీటీడీకి 40 రూపాయలు ఖర్చవుతోంది. ముడి సరుకుల ధరల పెరుగుదలే ఇందుకు కారణమని అధికారులు అంటున్నారు.
సాధారణ రోజుల్లో శ్రీవారిని దర్శించుకునే భక్తుల సంఖ్య 60 వేల నుంచి 1.05 లక్షల వరకు ఉంటోంది. వీరిలో కాలిబాట భక్తులకు ఇచ్చే ఉచిత లడ్డూ, కాలిబాట, సర్వదర్శనం భక్తులకు ఇచ్చే సబ్సిడీ ధరతో కూడిన లడ్డూలతో టీటీడీకి ఏటా 200 కోట్లపైబడి నష్టం వస్తోందంటున్నారు. మూడేళ్ల క్రితమే కల్యాణోత్సవం లడ్డూ ధర 100 నుంచి 200 రూపాయలకు పెంచారు. ఇక వడ 25 నుంచి 100కి పెంచారు. కోరినన్ని లడ్డూలు కావాలనే భక్తులకు 50 చొప్పున విక్రయిస్తున్నారు. అమాంతం పెరిగిన ధరల కారణంగా వీటిని సామాన్య భక్తులు పొందలేని పరిస్థితి నెలకొని ఉంది.
కామెంట్‌లు
కామెంట్‌ను పోస్ట్ చేయండి