ప్రభుత్వం సహకారం..పెట్టుబడులకు స్వాగతం
ఏటా కార్ల ఉత్పత్తి సామర్థ్యం 70 వేల నుంచి 3 లక్షలకు చేరడం వల్ల ప్రత్యక్షంగా 11 వేల మందికి, పరోక్షంగా 7 వేల మందికి ఉపాధి దొరుకుతుందన్నారు. ఏపీలో కియా సంస్థ పెట్టుబడులు పెట్టడం దేశానికే గర్వకారణమని, అన్ని విభాగాల్లో పూర్తి స్థాయిలో ఉత్పత్తి ప్రారంభం కావడం సంతోషకరమన్నారు. ఇందుకోసం కృషి చేసిన కియా సిబ్బందికి సీఎం అభినందనలు తెలిపారు. ప్లాంటులో కార్ల తయారీ యూనిట్‌కు సంబంధించిన అన్ని విభాగాలను సీఎం పరిశీలించారు. ఇదిలా ఉండగా తమ సంస్థకు ప్రభుత్వం నుంచి మంచి సహకారం అందుతోందని కియా సంస్థ గ్లోబల్‌ సీఈవో హన్‌ ఊ పాక్‌ తెలిపారు. అత్యాధునిక సాంకేతిక నైపుణ్యంతో ఏర్పాటైన ఈ ప్లాంటు ప్రపంచ స్థాయి కార్ల తయారీ యూనిట్ల సరసన నిలుస్తుందన్నారు.
2020 నాటికి ప్రపంచ వ్యాప్తంగా ఏటా 28 లక్షల కార్లను విక్రయించాలనేది తమ లక్ష్యమని, ఈ యూనిట్‌ ఇందులో కీలక పాత్ర పోషిస్తుందని చెప్పారు. తమ సంస్థ నుంచి త్వరలో రానున్న ‘కియా కార్నివల్‌’ కారును భారతీయుల అవసరాలకు అనుగుణంగా ప్రవేశ పెట్టనున్నట్లు ప్రకటించారు. కియా ప్లాంటులో తయారైన సెల్టోస్‌ కారుకు ఇప్పటికే మంచి ఆదరణ లభిస్తోందని హన్‌ తెలిపారు. ఒకేరోజు రికార్డు స్థాయిలో 6,046 బుకింగ్స్‌ చేసుకున్నారని చెప్పారు. గత నాలుగు నెలల్లోనే 40,649 కార్లను విక్రయించినట్లు తెలిపారు. రానున్న రోజుల్లో మరిన్ని సంస్థలు పెట్టుబడులు పెట్టేందుకు ముందుకు వస్తాయని భారత్‌లో కొరియా రాయబారి బోంగో కిల్‌షిన్‌ వెల్లడించారు.
కామెంట్‌లు
కామెంట్‌ను పోస్ట్ చేయండి