నటనలో మేటి ..కృష్ణకుమారి..!

తెలుగు సినిమా రంగం ఇప్పుడు కొత్త పుంతలు తొక్కుతోంది. ఇప్పుడున్న అవకాశాలు అప్పుడు లేవు ..సాంకేతిక పరంగా  చాలా మార్పులు చోటు చేసుకున్నాయి. పాత తరం నటీమణుల్లో కృష్ణకుమారి ఒకరు. ఆమె స్వస్థలం బెంగాల్. అనుకోకుండా ఆమె సినిమా రంగంలోకి ప్రవేశించారు. 1933 లో జన్మించిన ఆమె 2018 లో మరణించారు. తెలుగు, తమిళ, కన్నడ భాషల్లో సుమారు 25 సంవత్సరాలకు పైగా 150 లకు పైగా  చిత్రాల్లో నటించారు.  మూడు జాతీయ పురస్కారాలు, రాష్ట్ర ప్రభుత్వ నంది పురస్కారాలు అందుకున్నారు.  తండ్రి ఉద్యోగ రీత్యా పలు చోట్లకు మారారు. చెన్నైలో ఉండగా సినిమా రంగంలోకి ఎంటర్ అయ్యారు. వివాహంతర్వాత  భర్తతో కలిసి బెంగుళూరులో ఉన్నారు. 

వేదాంతం జగన్నాథ శర్మ దగ్గర శాస్త్రీయ సంగీతం నేర్చుకున్నారు. షావుకారు జానకి ఈమెకు పెద్దక్క. మరో అక్క దేవకి కూడా ఒకటి, రెండు సినిమాల్లో నటించారు. కానీ ఆమె చిన్న వయసులోనే మరణించింది. తండ్రి బదిలీల మూలంగా విద్యాభ్యాసం రాజమండ్రి, చెన్నై, అస్సాం, కలకత్తా మొదలైన ప్రదేశాలలో జరిగింది. మెట్రిక్ అస్సాంలో పూర్తయిన తర్వాత మద్రాసుకు చేరుకుంది వీరి కుటుంబం. ఒకసారి ఆమె తల్లితో సహా స్వప్నసుందరి సినిమా చూడడానికి వెళితే అక్కడకి సౌందరరాజన్ గారి అమ్మాయి భూమాదేవి కూడా వచ్చింది. సినిమా హాల్లో కృష్ణకుమారిని చూసిన ఆమె  కనిపించే కథానాయిక కోసం వెతుకుతున్నట్లు చెప్పారు. తర్వాత రోజే వారు కృష్ణకుమారి ఇంటికి వచ్చి తల్లిదండ్రుల అనుమతి తీసుకొని ఆమెకు ఆ పాత్రనిచ్చారు.

అలా తెలుగు సినిమా తెరకు 1951లో నిర్మించిన నవ్వితే నవరత్నాలు సినిమా ద్వారా పరిచయం అయ్యారు. కానీ దానికంటే ముందు మంత్రదండం అనే సినిమా విడుదలైంది. తొలి చిత్రంలో నటిస్తుండగానే ఆమెకు 14 సినిమాల్లో అవకాశాలు వచ్చాయి. అప్పటికి ఆమె వయసు కేవలం 16 ఏళ్ళు మాత్రమే. తర్వాత 1953లో తాతినేని ప్రకాశరావు యన్.ఎ.టి.వారి పిచ్చి పుల్లయ్యలో కథానాయిక వేషం వేయించారు. అందులో మంచి నటన ప్రదర్శించిన కృష్ణకుమారికి పినిశెట్టిగారి పల్లె పడుచు, బంగారు పాప వంటి చిత్రాలతో పరిశ్రమలో మంచి గుర్తింపు వచ్చింది.

తరువాత ఇలవేల్పు, జయ విజయ, అభిమానం, దేవాంతకుడు మొదలైన చిత్రాలలో వివిధ కథానాయకుల సరసన నటించినా, తన నటనకు గుర్తింపు తెచ్చిన చిత్రాలు   భార్యాభర్తలు, కులగోత్రాలు.  భార్యాభర్తలులో అభిమానం గల టీచరు శారదగా ఆమె చూపిన నటన ఆకట్టుకుంది.  శోభనం గదిలో భర్త సమీపించినప్పుడు చూపిన అసహనం, ఆ తరువాత వేడుకలో పాల్గొని 'ఏమని పాడిదనో యీ వేళ' అన్న వీణ పాట పాడినప్పుడు చూపిన హావ భావాలు  అలరించాయి . క్లిష్టమైన పాత్రకు న్యాయం చేసి పరిశ్రమ చేత ప్రేక్షకుల చేత శబాష్ అనిపించుకున్నారు కృష్ణకుమారి. 

1963లో లక్షాధికారి, బందిపోటు, ఎదురీత, కానిస్టేబుల్ కూతురు చిత్రాల్లో వైవిధ్యం ఉన్న పాత్రలలో నటించి మెప్పించారు. ప్రభుత్వ బహుమతి పొందిన జగపతీ పిక్చర్స్ వారి అంతస్థులులో నాయికగా నటించారు. 1967-68 మధ్యకాలంలో ఉమ్మడి కుటుంబం, భువనసుందరి కథ, రహస్యం, చిక్కడు దొరకడు, స్త్రీ జన్మ వంటి చిత్రాలలో వైవిధ్యమున్న పాత్రలు పోషించారు. సుమారు రెండు దశాబ్దాల నటజీవితంలో ఈమె సుమారు 150 సినిమాలలో నటించింది.  ఎక్కువగా తెలుగు సినిమాలైతే, 15 కన్నడ చిత్రాలు , కొన్ని తమిళ భాషా చిత్రాలు ఉన్నాయి . మూడు భాషల చిత్రాల్లోనూ స్వయంగా డబ్బింగ్ చెప్పుకోవడం విశేషం. నందమూరి తారక రామారావు, అక్కినేని నాగేశ్వరరావు, కాంతారావు, కృష్ణంరాజు, జగ్గయ్య, హరనాథ్  నటులతోను నటించింది. 

బాలీవుడ్ లో కిశోర్ కుమార్ తో ఒకే ఒక సినిమాలో కథానాయికగా నటించింది. అప్పటికి హిందీ చిత్ర పరిశ్రమలో కృష్ణకుమారి పేరుతో వేరే నటి ఉండటంతో రతి అనే పేరుతో పరిచయం అయింది. దాని తర్వాత బాలీవుడ్ లో పలు అవకాశాలు వచ్చినా తెలుగు సినీ పరిశ్రమను వదిలి వెళ్ళలేదు. 1963 లో కృష్ణకుమారి 16 సినిమాల్లో కథానాయికగా నటించింది. ఒక్క ఏడాదిలో అత్యధిక సినిమాల్లో కథానాయికగా నటించింది. మూడుసార్లు జాతీయ అవార్డులు, రాష్ట్ర స్థాయిలో నంది అవార్డులు అందుకున్నారు. అంతే కాకుండా  కాంచనమాల, సావిత్రి, ఎన్టీయార్ అవార్డులు గెలుచుకున్నది.  ఆమె లేకపోయినా ఆమె నటన ఇంకా వెంటాడుతూనే ఉంటుంది.