కార్మికుల ఆందోళన..ఫిట్‌మెంట్‌ పెరిగేనా
ఆ వెంటనే సీఎం కేసీఆర్‌ ఉద్యోగులతో సమావేశమై ఫిట్‌మెంట్‌ను ఖరారు చేసే అవకాశం ఉంది. పీఆర్‌సీ నివేదికను 12 రోజుల్లో సమర్పించాలంటూ పీఆర్‌సీ చైర్మన్‌ బిస్వాల్‌ను సీఎం ఆదేశించారు. ఫిట్‌మెంట్‌ ఆధారంగానే వేతనాల పెంపుదల ఉండనుంది. దీంతో ఎక్కువ మొత్తంలో ఫిట్‌మెంట్‌ సాధనకు సీఎంను ఒప్పించాలని ఉద్యోగులు కోరుతున్నారు. రాష్ట్రంలో ప్రస్తుతం 2.62 లక్షల మంది ఉద్యోగులు, ఉపాధ్యాయులు, 2.67 లక్షల మంది పెన్షనర్లు ఉన్నారు. మొత్తంగా 5.29 లక్షల మందికి పీఆర్‌సీని అమలు చేయాల్సి ఉంటుంది. వారికి ఒక శాతం ఫిట్‌మెంట్‌ అమలు చేస్తే ఏటా అదనంగా 225 కోట్లను ప్రభుత్వం వెచ్చించాల్సి ఉంటుందని పీఆర్‌సీ వర్గాలు అంచనా వేశాయి. ఇలా ఒక శాతం నుంచి మొదలుకొని 35 శాతం వరకు ఫిట్‌మెంట్‌ ఇస్తే వెచ్చించాల్సిన మొత్తంపై లెక్కలు కట్టాయి.
రాష్ట్రంలోని ఉద్యోగులకు 20 శాతం ఫిట్‌మెంట్‌ ఇస్తే 4,500 కోట్లు, 22 శాతం ఇస్తే 4,950 కోట్లు, 24 శాతం ఇస్తే 5,400 కోట్లు, 25 శాతం ఇస్తే 5,625 కోట్లు, 27 శాతం ఫిట్‌మెంట్‌ ఇస్తే 6,075 కోట్లు ప్రభుత్వం వెచ్చించాల్సి వస్తుందని లెక్కలు వేశారు. పీఆర్‌సీ నివేదిక అందిన వెంటనే సీఎం కేసీఆర్‌ ఉద్యోగ సంఘాలతో సమావేశం నిర్వహించి ఫిట్‌మెంట్‌ను ఖరారు చేయనున్నారు. ఆంధ్రప్రదేశ్‌లో ఉద్యోగులకు 27 శాతం ఐఆర్‌ ఇచ్చిన నేపథ్యంలో రాష్ట్రంలోనూ కనీసం 27 శాతం ఫిట్‌మెంట్‌ ఇస్తారని, అంతకంటే ఎక్కువ సాధించుకోవాలన్న ఆలోచనల్లో ఉద్యోగ సంఘాలు ఉన్నాయి. ఉద్యోగులకు పీఆర్‌సీతో పాటు రిటైర్మెంట్‌ వయసు 61 ఏళ్లకు పెంపు, కాంట్రిబ్యూటరీ పెన్షన్‌ స్కీం రద్దుపై కమిటీ ఏర్పాటు వంటి అంశాలపైనా వేతన సవరణ సంఘం సిఫార్సు చేసే అవకాశం ఉంది. మొత్తం మీద ఉద్యోగులకు రాబోయే కాలం పండగే అన్నమాట.
కామెంట్‌లు
కామెంట్‌ను పోస్ట్ చేయండి