కార్మికుల భవితవ్యం..సీఎంపైనే ఆధారం

తమ న్యాయపరమైన డిమాండ్లను పరిష్కరించాలని కోరుతూ చేపట్టిన ఆందోళన ఆఫ్ సెంచరీకి చేరుకుంది. ఇప్పటి దాకా తెలంగాణ ప్రభుత్వం నుంచి, ముఖ్యమంత్రి కేసీఆర్ వైపు నుండి ఎలాంటి స్పందన కనిపించలేదు. ఇన్ని రోజులు గడిచినా శాశ్వత పరిష్కారానికి నోచుకోక పోవడంతో వేలాది మంది కార్మికులు తీవ్ర ఆందోళనకు గురయ్యారు. ఈ మేరకు హైకోర్టు ధర్మాసనం కార్మికుల పట్ల మానవతా దృక్పథంతో నిర్ణయం తీసుకోవాలని సీఎంకు సూచించింది. దీంతో ఆర్టీసీ భవితవ్యంపై ముఖ్యమంత్రి కేసీఆర్ ఉన్నత స్థాయి సమావేశం నిర్వహించి కీలక నిర్ణయాలు తీసుకునే అవకాశం ఉంది.

సంస్థ మనుగడ, రూట్ల ప్రైవేటీకరణ, సమ్మెలో ఉన్న కార్మికుల భవితవ్యంపై ఈ భేటీలో కూలంకషంగా చర్చించి తుది నిర్ణయం తీసుకోవచ్చని తెలుస్తోంది. రూట్ల ప్రైవేటీకరణపై హైకోర్టు తీర్పు వచ్చిన తర్వాత అన్ని అంశాలను చర్చించి ఆర్టీసీపై తుది నిర్ణయం తీసుకోవాలని గత ఉన్నత స్థాయి సమావేశంలో నిర్ణయించారు. 5,100 రూట్ల ప్రైవేటీ కరణకు కేబినెట్‌ నిర్ణయానికి అనుకూలంగా హైకోర్టు వెలువరించిన తీర్పు ప్రతి కొద్దీ గంటల్లో అందుబాటులోకి రానుందని, దీనిపై ఉన్నత స్థాయి సమావేశం నిర్వహించి ఆర్టీసీపై కీలక నిర్ణయాలు తీసుకుంటారని రవాణా శాఖ వర్గాలు పేర్కొం టున్నాయి.

ఆర్టీసీని నడపడానికి ప్రతి నెలా 640 కోట్లు కావాలని, ఈ మొత్తాన్ని భరించే శక్తి సంస్థకు లేదా తమకు లేదని ప్రభుత్వం చేతు లెత్తేసింది. దీన్నుంచి బయట పడేందుకు బస్సు చార్జీల పెంపు ఒకటే మార్గమని, కానీ దీనివల్ల సామాన్యులు ఇబ్బంది పడతారని అభిప్రాయ పడింది. ఈ పరిస్థితుల నేపథ్యంలో ఆర్టీసీని యథావిధిగా నడపడం సాధ్యం కాదని ప్రకటించింది. ఈ పరిస్థితులను కారణంగా చూపుతూ ఆర్టీసీ భవితవ్యంపై ప్రభుత్వం కఠిన నిర్ణయాలకు సిద్ధమైంది. రూట్ల ప్రైవేటీకరణకు ఇప్పటికే రవాణా శాఖ ముసాయిదా విధి విధానాలను రూపొందించింది.

ఈ అంశంపైనే ముఖ్యమైన నిర్ణయాలు తీసుకోనున్నట్లు తెలుస్తోంది. కార్మికులను బేషరతుగా విధుల్లోకి తీసుకుంటే సమ్మె విరమిస్తామని ఆర్టీసీ కార్మిక జేఏసీ చేసిన ప్రకటనపై ఇప్పటివరకు ప్రభుత్వం స్పందించ లేదు. ఈ అంశంపై ప్రభుత్వ వైఖరి కోసం సమ్మెలో కొనసాగుతున్న కార్మికులు ఆతృతతో ఎదురు చూస్తున్నారు. దీని పైనా ప్రభుత్వం నిర్ణయం ప్రకటించే అవకాశం ఉంది. ఇదిలా ఉండగా ఆర్టీసీ సంస్థలో రిటైర్మెంట్ కు దగ్గరగా ఉన్న ఉద్యోగులతో పాటు 50 ఏళ్ళు పైబడిన వారికి స్వచ్చంద పదవీ విరమణ చేసుకునే అవకాశం ఇవ్వనున్నట్లు సమాచారం.